कपिलवस्तु, साउन २८ — मलखादको सहज आपूर्ति सुनिश्चित गर्न र कालोबजारी रोक्नुपर्ने माग गर्दै जनता समाजवादी पार्टी (जसपा) नेपालले बुधबार तौलिहवास्थित जिल्ला प्रशासन कार्यालय अगाडि एक घण्टा धर्ना दिएको छ।
धर्नामा जिल्ला अध्यक्ष शैलेन्द्र कुमार यादव, केन्द्रीय सदस्यहरू अब्दुल रसिद खाँ र रामनिवास यादवसहितका पार्टीका नेता–कार्यकर्ताले सहभागी हुँदै सरकारविरुद्ध नाराबाजी गरेका थिए।
अध्यक्ष यादवले मलको अभावका कारण कपिलवस्तुका कृषकहरू चरम समस्यामा परेको बताए। उनले अन्नभण्डारका रूपमा चिनिने जिल्लामा कृषकहरूले युरिया र डीएपी मल नपाउँदा धान खेती संकटमा परेको उल्लेख गर्दै, “सरकारले अनेक बहाना गरेर किसानलाई झुक्याइरहेको छ” भने।
उनका अनुसार सीमित अनुदानको मलमा कृषि सहकारीहरूकै हालीमुहाली छ, जबकि भारतबाट केही बोरा मल ल्याउने किसानलाई समेत सुरक्षाकर्मीले रोकतोक गर्ने गरेको छ। उनले तत्काल मलको व्यवस्था गर्न सरकारलाई आग्रह गर्दै, “नत्र किसान सडक आन्दोलनमा उत्रनेछन्” भनेर चेतावनी दिए।
त्यसैगरी केन्द्रीय सदस्य अब्दुल रसिद खाँ र रामनिवास यादवले पनि कपिलवस्तुका किसानले हरेक वर्ष मलखाद अभावको समस्या भोगिरहेको बताउँदै सरकारले तत्काल आपूर्ति सुनिश्चित गर्नुपर्ने माग गरे।
