साझा न्यूज । कपिलवस्तु
कपिलवस्तु लगायत लुम्विनी प्रदेशका तराई मधेशका जिल्लाहरुमा विहिवार महिलाहरुले खुशीयालीका साथ त्रिछठ्ठी पर्व मनाएका छन् ।
आफ्नो छोराको दिर्घायु तथा सुस्वास्थ्यको कामना गर्दै यहांका मधेशी समुदायका महिलाहरुले यो पर्व मनाएको यशोधरा गाउंपालिकाकी निवर्तमान उपप्रमुख कन्यावती उपाध्यायले बताईन् । पर्वकाे विशेष महत्व रहेका कारणा बुहारीकाे साथमा म पनि पुजा गर्न अाएकाे निवर्तमान उपप्रमुख उपाध्यायले भनिन् ।
पर्वमा महिलाहरुले विहान सवेरै उठी स्नान गरी कुश र वरियाराको पुजा गरे । महुवाको पात छठ्ठी मातालाई चढाउने र हांगाको दतिवन गरे ।
कसैले घर किनारको चौरमा त कसैले देवी स्थानमा बसेर यो पुजा गरे । पुजा सकिए लगत्तै महिलाहरुले त्रिछठ्ठी माताको कथा श्रवण गरेको कपिलवस्तु नगरपालिका १ का सुरज गुप्ताले बताए ।
छोराको लागि मेरी पत्नीले त्रिछठ्ठी पुजा सम्पन्न गरिन्, गुप्ताले भने, “हाम्रो समुदायका छोरा हुने सवै महिलाहरुले हर्ष उल्लासका साथ यो पर्व मनाउछन् ।”
पुजाको अवसरमा महिलाले जोत गोढ नगरेको बांझे खेतमा उब्जिएको धानको चामल (तिन्नी चामल), साग, फलफुल, दही, कागती, महुवा, अम्बा लगायतका खानेकुराहरु खाने गर्छन् ।
लुम्विनी प्रदेशको कपिलवस्तु, रुपन्देही र नवलपरासी जिल्ला लगायत तराई मधेशमा यो पर्वलाई महिलाहरुले हरेक वर्ष धुमधामका साथ मनाउने गरेका छन् ।
त्रिछठ्ठी पर्व तराई मधेशका महिलाहरुको पवित्र पर्व भएका कारण यस दिन कपिलवस्तु नगरपालिकाले पालिका क्षेत्रका विद्यालयहरुमा स्थानीय विदा समेत दिएको छ ।
पर्वको अवसरमा कपिलवस्तु नगरपालिकाका नगर प्रमुख सुदीप पौडेलले सम्पूर्ण महिलाहरुमा शुभकामना व्यक्त गरेका छन् ।
यसै गरी लुम्विनी प्रदेश सभा सदस्य सुधाकर पाण्डेय, संघीय सांसद तथा पुर्व मन्त्री सुरेन्द्र राज आचार्य, पुर्वमन्त्री बृजेश कुमार गुप्ताले पनि व्रतालु महिलाहरुलाई पर्वको अवसरमा शुभकामना व्यक्त गरेका छन् ।
