साझा न्यूज । कपिलवस्तु
अपांगता भएका व्यक्तिको ३४ औं अन्तराष्ट्यि दिवस २०८२ को अवसरमा बहिरा बालबालिकाहरुलाई न्यानो कपडा तथा शैक्षिक सामाग्री वितरण गरिएको छ ।
दिवसका अवसरमा तौलिहवा स्थित श्री तौलेश्वरनाथ संस्कृत मा.वि.मा संचालित वहिरा विशेष कक्षाका १५ जना बोल्न र सुन्न नसक्ने बालबालिकाहरुलाई प्रमुख जिल्ला अधिकारी जनार्दन गौतमले स्वेटर र कापी वितरण गरेका छन् ।
यसका साथै जिल्ला समन्वय अधिकारी जर्नादन अधिकारी, सामाजिक विकास डिभिजन कार्यालयका प्रमुख विष्णु प्रसाद भुषाल, विद्यालयका प्रधानाध्यापक पुजारी प्रसाद चौधरीले पनि वहिरा बालबालिकाहरुलाई सो सामाग्रीहरु वितरण गरेका थिए ।
कार्यक्रममा प्रमुख जिल्ला अधिकारी गौतमले फरक क्षमता भएका बालबालिकाहरुको संरक्षणको जिम्मेवारी राज्यको भएको हुंदा ३ वटै तहका सरकारले आआफ्नो ढंगबाट यसको पालना गर्नु पर्नेमा जोड दिए ।
वितरण गरिएका सो सामाग्रीहरु सामाजिक विकास डिभिजन कार्यालय कपिलवस्तुले व्यवस्थापन गरेको थियो । जाडो मौसम शुरु भए संगै वहिरा विद्यार्थीहरुले स्वीटर पाउंदा निकै खुशी भएका छन् ।
सो अवसरमा वहिरा विशेष कक्षाकी सहयोगी कार्यकर्ता मेनुका राजचल, बहिरा संघ कपिलवस्तुका अध्यक्ष रिंकु गुप्ता, कार्यालय सहायक गिरिजेश पाण्डेय, दोभाषे शिवा पासी लगायतको उपस्थिति रहेको थियो ।
