कपिलवस्तु, फागुन ५ गते । नेकपा एमालेका जिल्ला सचिवालय सदस्य तथा कपिलवस्तु क्षेत्र नं. १ का निर्वाचन सह–संयोजक बजरंगी प्रसाद चौधरीले पार्टीका सम्पूर्ण जिम्मेवारीबाट राजीनामा दिनुभएको छ।
चौधरीले आज जारी गर्नुभएको विज्ञप्तिमा देशको वर्तमान राजनीतिक अवस्था र परिस्थितिलाई मध्यनजर गर्दै परिवर्तनका लागि (Gen Z) युवाहरूले थालेको आन्दोलनलाई आत्मसात् गर्दै नेकपा एमालेका सबै पदबाट राजीनामा दिएको उल्लेख गर्नुभएको छ।
उहाँ २०८२ सालको महाधिवेशन प्रतिनिधिसमेत रहनुभएको थियो। साथै मायादेवी गाउँपालिकाका पूर्व अध्यक्षसमेत रहनुभएका चौधरीको राजीनामालाई स्थानीय राजनीतिक वृत्तमा अर्थपूर्ण रूपमा हेरिएको छ।
राजीनामापछि उहाँको आगामी राजनीतिक यात्रा र भूमिकाबारे चासो बढेको छ।
