काठमाडौं । नाकबाट सिँगान बग्ने, हाच्छिउँ आउने, खोकी लाग्ने, ज्वरो आउने, घाँटी दुख्ने कोरोना भाइरसका सामान्य लक्षण हुन्।
यी लक्षण हरेक वर्ष जाडो महिनामा देखिने रुघाखोकी वा फ्लूको समस्यासँग मिल्दोजुल्दो छन् । चिकित्सकहरूका अनुसार कोभिड र मौसमी फ्लूबीच निकै कम फरक रहेकाले आफूलाई के भएको हो थाहा पाउन सहज हुँदैन । कोभिडको ओमिक्रोन भेरिएन्टको लक्षण पनि फ्लू र रुघाखोकी जस्तै रहेको शुक्रराज ट्रपिकल तथा सरुवा रोग अस्पताल टेकुको क्लिनिकल रिसर्च युनिटका प्रमुख डाक्टर शेरबहादुर पुन बताउँछन् ।
जसकारण परीक्षण नगरी सङ्क्रमण छुट्टाउन गाह्रो हुने डाक्टर पुनको भनाइ छ । डाक्टर पुनले ओमिक्रोनको लक्षणलाई डेङ्गीसँग दाँज्दै बिरामीले टाउकोको अगाडिको भाग वा आँखा नजिकको भाग एकदमै दुखेको वा जिउ एकदमै दुखेको महसुस गर्ने बताएका छन् । रुघाखोकीमा टाउको, जिउ दुख्ने घाँटी दुख्ने वा खसखसाउने भए पनि मन्द हुन्छ ।
ओमिक्रोनका बिरामीमा त्यस्तो दुखाइ पनि अलि बढी हुने उनी बताउँछन् । महामारीको समयमा भएकाले रुघाखोकी वा सास फेर्न गाह्रो हुने, घाटी खसखस गर्ने, टाउको दुख्ने वा पखाला लाग्ने जुनसुकै लक्षण भए पनि परीक्षण गर्ने, अलग्गै बस्ने वा सावधानी अपनाउनुपर्ने जस्ता कुरामा ध्यान दिनुपर्ने स्वास्थ्य तथा जनसङ्ख्या मन्त्रालयका सहप्रवक्ता डाक्टर समीरकुमार अधिकारी बताउँछन् ।
मौसमी रुघाखोकी भनेर बेवास्ता गरेमा कोभिड-१९ को सङ्क्रमण झनै फैलिएर भयावह हुनसक्ने उनको भनाइ छ ।
