कपिलवस्तु, भदौ ११ । कपिलवस्तु कालिका युवा क्लबको आयोजनामा आगामी असोज २८ गतेदेखि सुरु हुने प्रदेशस्तरीय क्रिकेट प्रतियोगिता सम्बन्धी पत्रकार सम्मेलन मार्फत जानकारी गराइएको छ ।
पत्रकार सम्मेलनमा क्लबका अध्यक्ष सरोज डफली, माहुरी होमका अध्यक्ष रामदयाल ठाकुर, युवा नेता रासिद मिर्जा, नेकपा (माओवादी) का जिल्ला अध्यक्ष विष्णु बेलबासे लगायतको उपस्थिति रहेको थियो ।
आयोजकका अनुसार प्रतियोगितामा प्रदेशका १६ वटा टिमले सहभागिता जनाउनेछन् । प्रतियोगितामा प्रथम हुने टिमलाई १ लाख रुपैयाँ नगद, प्रमाणपत्र, शिल्ड र मेडल प्रदान गरिनेछ भने दोस्रो हुने टोलीलाई ५० हजार नगदसहित प्रमाणपत्र, शिल्ड र मेडल प्रदान गरिनेछ ।
प्रतियोगिता सफल बनाउन बाणगंगा माध्यमिक विद्यालय, गायछाप डिटर्जेन्ट पाउडर, आर्किड ओभरसिरिज प्रा.लि., तिलौराकोट हस्पिटल प्रा.लि., बजाज, मार्स कम्प्युटर लगायत विभिन्न संस्थाहरूले सहयोग गर्ने भएका छन् ।
आयोजक क्लबका अध्यक्ष सरोज डफलीले खेलकुदले युवालाई अनुशासित, सक्षम र समाजप्रति जिम्मेवार बनाउन सहयोग पु¥याउने भएकाले यस किसिमका प्रतियोगिताले जिल्लाको मात्र नभई प्रदेशस्तरमै प्रतिभा पहिचानमा टेवा पु¥याउने बताए ।
युवा नेता रासिद मिर्जाले जिल्लामा यस्ता खेलकुद प्रतियोगिताले युवाहरूलाई सकारात्मक मार्गमा अग्रसर गराउने बताए । उनले खेलमार्फत सद्भाव, मित्रता र विकासका लागि सामूहिक प्रयासलाई बल पुग्ने विश्वास व्यक्त गरे ।
त्यस्तै, नेकपा (माओवादी) का जिल्ला अध्यक्ष विष्णु बेलबासेले खेलकुदलाई सामाजिक विकाससँग जोड्दै प्रतियोगिताले जिल्लाको गौरव बढाउने बताए । उनले भविष्यमा पनि जिल्लामा खेलकुदको स्तर अभिवृद्धि गर्न सक्ने खालका गतिविधिमा सहकार्य गर्ने प्रतिबद्धता व्यक्त गरे ।
प्रतियोगितामा करिब ६ लाख ७० हजार रुपैयाँ खर्च हुने अनुमान गरिएको छ । उक्त प्रतियोगिता असोज २८ गतेदेखि कार्तिक १० गतेसम्म सञ्चालन हुनेछ । अहिलेसम्म आठवटा टिमले नाम दर्ता गराइसकेका छन् ।
कपिलवस्तुमा असोज २८ गतेदेखि प्रदेशस्तरीय क्रिकेट प्रतियोगिता हुने
