ब्ल्याकमेलिङ तथा ठगीमा संलग्न भएको अभियोगमा महानगरीय प्रहरी अपराध महाशाखाको टोलीले दुई युवतीलाई नियन्त्रणमा लिएको छ । उर्मिला भन्ने १९ वर्षीया युनिसा मगर र रोशनी भन्ने २६ वर्षीया सुनिता तामाङलाई प्रहरीले पक्राउ गरेको हो ।
उनीहरुले चिरपरिचित एवम् अंतरंगी सम्बन्ध भएको युवकलाई फसाएर सुनका गहना लुटेका र सहमतिमै यौन सम्बन्ध राखेको पुरानो सेक्स भिडियोको हवाला दिएर युवकलाई ब्ल्याकमेलिङको प्रयास गरेका थिए ।
प्रहरीले जनाएअनुसार उर्मिला र रोशनीले केही समयअघि साथीको बर्थडे मनाउन भन्दै ती युवकलाई एयरपोर्ट बोलाएर त्यहाँबाट चापागाउँ जाउँ भने । चापागाउँनजिकैको एक कटेजमा पुगेपछि जन्मदिन मनाउने भनिएका व्यक्ति त्यहाँ थिएनन् । सुनियोजित योजनामा अघि बढिरहेका युवतीहरुले ती व्यक्ति नआएपनि हामी मात्र भएपनि रमाइलो गरौँ भनी प्रस्ताव राखे । युवक पनि उनीहरुसँग झ्याम्मिए । पहिले पनि शारीरिक सम्बन्ध भइसकेकोले युवकको मनमा कुनै शंका पनि थिएन ।
तर, युवकले लगाएको सिक्री ‘कति राम्रो रहेछ’ भन्दै टिकटक बनाउन लगाउँछौँ भन्दै उनीहरुले मागेर बाहिर निस्किएपछि घटनाले नयाँ मोड लियो । एकछिनमा आउँछौँ भनेका ती युवतीहरु फर्किएनन् । त्यसपछि ती युवकले फोन गरेर आफ्नो सिक्री मागे तर उनीहरुले सिक्री फिर्ता गर्नुको साटो उल्छै धम्की दिए । दायाँबायाँ गरे पुरानो सेक्स भिडियो देखाएर बलात्कारमा मुद्दा हाल्छौँ भन्ने धम्की दिएपछि युवक छाँगाबाट खसेजस्तै भए ।
पीडित युवकको जाहेरीका आधारमा पक्राउ परेका उर्मिला र रोशनीमाथि प्रहरीले ठगी मुद्दामा ती अनुसन्धान अगाडि बढाएको छ ।
