काठमाडौँ । गण्डकी प्रदेशमा आउँदो माघ १२ गते हुने राष्ट्रियसभाको निर्वाचनका लागि नेकपा (एमाले)का तीन उम्मेदवारले उम्मेदवारी दर्ता गराएका छन् ।
जिल्ला निर्वाचन कार्यालय कास्कीका सूचना अधिकारी रुद्र न्यौपानेका अनुसार आज बिहान ११ बजेदेखि साढे ११ बजेको बीचमा एमालेका पुण्यप्रसाद पौडेल, लीला थनेत थारु र अर्जुनकुमार सुनामले उम्मेदवारी दर्ता गराएका हुन् । कास्कीका पौडेलले अन्य, नवलपुरकी थनेतले महिला र सुनामले दलित क्लस्टरबाट निर्वाचन लड्दै छन् ।
सत्तारुढ गठबन्धनको भागबन्डामा नेपाली कांग्रेसले एक, नेकपा (माओवादी केन्द्र)ले दुई सिट पाएका छन् । गठबन्धनबाट कांग्रेसकी कमला पन्त, माओवादी केन्द्रका सुरेश आले मगर र भुवन सुनार उम्मेदवार छन् ।
मतभार हेर्दा सत्तारुढ गठबन्धनलाई सहज देखिएको छ ।
गण्डकी प्रदेशमा ८५ स्थानीय तहका १७० र ६० सदस्यीय प्रदेशसभाका ५९ गरी २२९ जना मतदात छन् । राष्ट्रिय जनमोर्चाका प्रदेशसभा सांसद् कृष्ण थापा कारबाहीमा परेपछि प्रदेशसभाको एक पद रिक्त छ ।
प्रदेशसभातर्फ सबैभन्दा धेरै एमालेको मतभार छ । २७ सांसद् रहेको एमालेको मतभार १ हजार २९६ हुन्छ । १५ सांसद् रहेको कांग्रेससँग ७२० मतभार छ । १२ सांसद् रहेको माओवादीसँग ५७६ मतभार छ भने राष्ट्रिय जनमोर्चा र जनता समाजवादी पार्टी (जसपा)सँग ९६÷९६ मतभार छ ।
स्थानीय तहतर्फ कांग्रेसका ८३ जनप्रतिनिधि छन् । उनीहरुको मतभार १ हजार ४१८ हुन्छ । ७० जना एमाले जनप्रतिनिधिको मतभार १ हजार २६० छ भने १२ जनप्रतिनिधि रहेको माओवादी केन्द्रको मतभार २१६ छ । गण्डकीमा जनमोर्चाका तीन र राप्रपाका २ जनप्रतिनिधि छन् । जनमोर्चाको ५४ र राप्रपाको ३६ मतभार छ ।
नेकपा (एकीकृत समाजवादी)को भने एकजना मात्र मतदाता छन् । स्याङ्जाको आँधीखोला गाउँपालिकाकी उपप्रमुख एकीकृत समाजवादीकी एकमात्र मतदाता हुन् । एकीकृत समाजवादीसँग १८ मतभार छ ।
गण्डकी प्रदेशमा स्थानीय र प्रदेशसभा गरी एमाले एक्लैको मतभार २ हजार ५५६ हुन्छ । ५ दलीय गठबन्धनमा कांग्रेस (२,१९६), माओवादी केन्द्र (७९२), जसपा (९६), जनमोर्चा (१५०) र एकीकृत समाजवादी (१८) मिल्दा मतभार ३ हजार २५२ हुन आउँछ । यसरी हेर्दा ५ दलीय गठबन्धनसँग एमाले ६९६ मतभारले पछाडि छ ।
स्वतन्त्र सांसद राजीव गुरुङ ‘दीपक मनाङे’ पनि गठबन्धनबाट सरकारमा सहभागी छन् । उनले पनि गठबन्धनलाई मत हाल्दा ३ हजार ३०० मतभार हुने देखिएको छ ।
राष्ट्रियसभाको निर्वाचनमा स्थानीय तहका प्रमुख/उपप्रमुख र प्रदेश सभाका सदस्य सहभागी हुन्छन् । स्थानीय तहका प्रमुख/उपप्रमुखको १८ र प्रदेश सभा सदस्यको मतभार ४८ हुने व्यवस्था छ ।
