काठमाडौं । सत्तारुढ गठबन्धनको बैठक शनिबार बस्ने भएको छ । बैठक प्रधानमन्त्रीनिवास बालुवाटारमा बिहान नौ बजे बोलाइएको छ ।
आगामी निर्वाचनका विषयमा छलफल गर्न सत्ता गठबन्धनको बैठक बस्न लागेको हो । बैठकमा स्थानीय तहसँगै प्रदेश र संघीय निर्वाचनका विषयमा छलफल हुने बताइएको छ । साथै, राष्ट्रिय सभा निर्वाचनका विषयमासमेत समीक्षा हुने पनि बताइएको छ ।
सत्ता गठबन्धनको बैठक बस्नुअघि प्रधानमन्त्री एवं नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपालले शुक्रबार बिहान छलफल गरेका थिए । तीन नेताबीच छलफल भएपछि शनिबार सत्ता गठबन्धनको बैठक बस्न लागेको हो ।
