काठमाडौं । नेपाली कांग्रेसका प्रवक्ता डा. प्रकाशशरण महतले एमसीसीकै कारण सत्ता गठबन्धन नटुट्ने बताए । सोमवार काठमाडौंमा पत्रकारहरूसँग कुरा गर्दै उनले एमसीसीकै कारण गठबन्धन टुट्ने अनुमान गर्नु हतारो हुने बताएका हुन् ।
उनले एमसीसी सहमतिमै पास हुने बताए । उनले प्रधानमन्त्री शेरबहादुर देउवा सबै दलको सहमतिमा एमसीसी पास गर्ने पक्षमा रहेको बताए । गठबन्धनका दुई दल माओवादी केन्द्र र नेकपा एसले यथास्थितिमा एमसीसी पास गरिए सरकार छाड्ने चेतावनी दिँदै आएका छन् ।
उनले भने, ‘हामीलाई आशा र विश्वास छ, जसरी एमसीसी टेबल गर्न गठबन्धनका दलले सहयोग गर्नुभयो पास गर्न पनि सहयोग गर्नुहुनेछ, हाम्रो तर्फबाट निरन्तर संवाद जारी छ । गठबन्धनमा समस्या आउने छैन, हामी विश्वास गर्न चाहन्छौँ । अहिले नै यो भयो भने के गर्नुहुन्छ भनेर अनुमान गर्न जरुरी छैन ।’