साझा न्यूज । तौलिहवा
कपिलवस्तु । स्थानीय निर्वाचनमा सामाजिक संजालबाट उम्मेदवारी घोषणा हुने गरेको गतिविधि प्रति नेपाली कांग्रेस कपिलवस्तु नगर समितिको गम्भीर ध्यानाकर्षण भएको जनाएको छ । कपिलवस्तु नगरपालिकाको नगर प्रमुख, उपप्रमुख र वडा अध्यक्षको पदमा आफु खुशी उम्मेदवारी घोषणा गर्दा पार्टी संगठनमा नकारात्मक प्रभाव पर्ने भन्दै यस्तो गतिविधी नगर्न नेपाली कांग्रेस नगर समितिले जनाएको छ ।
नगर सभापति खुर्सेद अहमद खांले एक प्रेस विज्ञप्ति जारी गरी आफु खुशी उम्मेदवारी घोषणा नगर्न आग्रह गरेका छन् ।
लोकतन्त्रको मुटु मानिएको आवधिक निर्वाचनमा उम्मेदवार हुन पार्टीका अग्रज नेताहरुमा ईच्छा जाग्नु स्वभाविकै हो, तर यो ईच्छालाई पार्टीका विभिन्न छलफल तथा बुथ ईकाई समितिहरुमा राख्न नगर सभापति खांले आग्रह गरेका छन् ।
पार्टी संगठनलाई कमजोर हुने गतिविधि गर्ने, आफु खुशी उम्मेदवारी घोषणा गर्ने जस्ता गतिविधी गर्ने नेता कार्यकर्ताहरुलाई वुथ ईकाई समितिले समेत सचेत गराउन आग्रह गरिएको नगर सभापति खांले बताए ।
