मधेश प्रदेशमा आज देशभरकै प्रदेशका आन्तरिक मामिला तथा गृहमन्त्री लगायतको भेला हुँदैछ । राजधानी जनकपुरधाममा मधेश प्रदेश सरकारको गृह तथा सञ्चार मन्त्रालयको आमन्त्रणमा छ वटै प्रदेशका आन्तरिक मामिला तथा गृहमन्त्री, सचिव तथा मुख्य न्यायाधिवक्ता सहितको भेला हुन लागेको हो ।
उक्त भेलाले शान्ति सुरक्षा तथा विपद् व्यवस्थापन सम्बन्धि अन्तर प्रदेश अनुभव आदान प्रदान तथा छलफल कार्यक्रम हुन लागेको जनाइएको छ । गृह तथा सञ्चार मन्त्रालयद्वारा जनकपुरधाममा आयोजना हुने अन्तर प्रदेश अनुभव आदानप्रदान कार्यक्रमका लागि सबै प्रदेशका गृहमन्त्रीको नेतृत्वमा रहेको टोलीले आ–आफ्नो प्रदेशको शान्ति सुरक्षा तथा विपद् व्यवस्थापन सम्बन्धि छलफल हुने गृह तथा सञ्चारमन्त्री भरतप्रसाद साहले जानकारी दिए ।छलफलबाट आउने निष्कर्षका आधारमा जनकपुरधाम साझा प्रतिबद्धता पत्र जारी गरिने मन्त्री साहले बताए । सात वटै प्रदेशका मन्त्रीहरुको टोलीको भेलाबाट शान्ति सुरक्षा तथा विपद् व्यवस्थापन सम्बन्धि आउने निष्कर्षलाई आधार बनाई जनकपुरधाम साझा प्रतिबद्धता पत्र जारी गरिने उनले बताए ।
मन्त्री साहले जनकपुरधाम साझा प्रतिबद्धता पत्रलाई तत्कालै कार्यान्वयन गरी प्रदेशवासीलाई शान्ति सुरक्षा तथा विपद् व्यवस्थापनका लागि लागिपर्ने बताए । उनले भने, ‘हाम्रो तर्फबाट जनकपुरधाम साझा प्रतिबद्धता पत्र कार्यान्वयन नै हुन्छ, तर संघ सरकारले कतिको सहयोग, समन्वय वा तदारुकता देखाउँछ, त्यो त्यतिबेला थाहा हुन्छ ।आज बिहान जानकी मन्दिरमा दर्शन गरेपछि जनकपुरधामस्थित सीताशरण होटेलमा कार्यक्रम सुरु हुनेछ ।
सो कार्यक्रममा शान्ति सुरक्षा तथा विपद् व्यवस्थापन सम्बन्धी अनुभव आदान प्रदान तथा छलफल, जनकपुरधाम साझा प्रतिबद्धता, २०९७ घोषणा, औपचारिक कार्यक्रम समापनपछि दिउँसो जनकपुरधाम–कुर्था–जनकपुरधाम रेल यात्रा समेत गर्ने कार्यतालिका रहेको छ ।त्यस्तै गृह तथा सञ्चार मन्त्रालयको निरीक्षण र सामुहिक रात्रि भोजन कार्यक्रमको व्यवस्था समेत गरिएको मन्त्रालयले जनाएको छ । त्यस्तै सो टोलीले असार २४ गते शुक्रबार बिहान धनुषाधामस्थित धार्मिकस्थलको भ्रमण गर्ने र उनीहरुलाई मायाको चिनो प्रदान गरी बिदाइ गर्ने कार्यक्रम रहेको मन्त्री साहले बताए ।
