फुकुओका/जापान।
जापानको फुकुओकास्थित एक कन्विनिएंस स्टोरमा म्यानेजरको रुपमा कार्यरत नेपाली युवा शालिकराम सापकोटा फुकुओका प्रहरीद्वारा प्रशंसा पत्र सहित सम्मानित भएका छन्।
जापानी संचार माध्यमहरुमा प्रकाशित खबरका अनुसार,ति युवाले आफ्नो पसलमा आएका एक वृद्ध उमेरका ग्राहकलाई ठगिमा पर्नबाट जोगाईदिई ठगि जन्य आपराधिक गतिविधिहरुलाई न्युनिकरण गर्न मद्दत गरेकोमा फुकुओका प्रिफेक्चर प्रहरीले उनको कर्मलाई प्रशंसा गर्दै सम्मान गरेको हो।
एक बृद्ध व्यक्तिलाई फोन गरि ठग्न खोज्ने ठगहरुले तिम्रो कम्प्युटरमा भाइरस पसेको छ, कन्बिनी स्टोरमा गई ५० हजार येनको कार्ड किन्नुपर्छ भनेपछि वृद्ध जापानीले विश्वास गरि फोनमा बोल्दै ठगहरुले भने अनुसार कार्ड किन्न कन्बिनी स्टोरमा पुग्दा नेपाली मेनेजर सापकोटाले यो ठगि केस हो भनि शंका लागि ति बृद्ध व्यक्तिको फोन मागेर कुरा के हो ? म यस व्यक्तिको छोरा हुँ भनि ठगहरुलाई भन्ने बित्तिकै फोन काटेहालेछन् ।
यसरी यदि उनले ग्राहकलाई केहि पनि नसोचि कार्ड बेचिदिएका भए ५० हजार येन ठगि हुने थियो । तर सापकोटाको तदारुकताले ति वृद्ध ठगिनबाट जोगिए । र यहि उपकारी कामका लागि प्रहरीले उनलाई सम्मान गरेको हो । यो घटना गत महिनाको २४ तारिख घटेको थियो भने,सापकोटालाई हिजो(नोभेम्बर ९ तारिख) प्रशंसा पत्र सहित सम्मान गरिएको हो ।
सापकोटा सामजिक संजाल टिकटक तथा युट्युब मार्फत जापानका नेपाली समुदाय लक्षित विभिन्न जानकारी मुलक सामग्रीहरु पनि सम्प्रेषण गर्ने गर्दछन् । जापानमा पछिल्ला केहि वर्षयता वृद्ध/वृद्धा लक्षित अनलाईन एव टेलिफोन ठगीका घटनाहरु बढ्दो गतिमा रहेको छ।
