दाङको तुलसीपुर उपमहानगरपालिका-१२ उरहरिनिवासी रामबहादुर वलीको हत्या अभियोगमा पक्राउ परेका बिक्की भनिने विवेकसिंह ठकुरीसहित चार जनालाई जन्मकैदको फैसला सुनाइएको छ ।
जिल्ला अदालत दाङका न्यायाधीश रितेन्द्रबहादुर थापाको एकल इजलासले ठकुरीसँगै सौरभ मल्ल, भरत शाही र रमेश केसीलाई जन्मकैदको सजाय सुनाएको हो ।
विसं २०७६ असार २८ गते उरहरीमा खुकुरी प्रहार गरी वलीको हत्या गरेको अभियोग उनीहरुमाथि लागेको थियो । सोही घटनामा संलग्न शुभम मल्ल, तेजेश पिएम, अमृत वली, सुन्दर बस्नेत र सरोज बुढामगरलाई साढे १२ वर्ष कैद सजाय सुनाइएको छ ।
विक्कीले यसअघि २०६९ मङ्सिर ३० गते दाङको मोतीपुरका जितबहादुर चौधरीलाई गोली हानी हत्या गरेका थिए । त्यतिबेला उनको उमेर १५ वर्षमात्रै भएकाले चौधरीलाई अदालतले सुधारगृह पठाएको थियो । तर सुध्रिनुको साटो बिक्की झन् झन् अपराधको दलदलमा डुब्दै गएका थिए । फलतः उनी बाँकी जीवन कैदीका रुपमा बिताउनुपर्ने अवस्थामा पुगेका छन् ।
