सिन्धुली । नेकपा एमालेका महासचिव शंकर पोखरेल नेकपा एमालेको सरकार बनेमात्रै देश बन्ने दाबी गरेका छन्। नेकपा एमाले सिन्धुलीलेले बुधबार मरिण गाँउपालिका(४ सहानमा आयोजना गरेको जनसभालाई सम्बोधन गर्दै उनले त्यसका लागि राजनीतिक ध्रुवीकरणसहितको नेतृत्व एमालेले गर्न खोजिरहेको स्पष्ट पारे।
‘हामी एमालेलाई बलियो राष्ट्रिय शक्तिका रुपमा एकीकृत गर्दै प्रदेश र संघीय निर्वाचनमा ठूलो दलका रुपमा स्थापित गर्ने अभियानमा जुटेको छौं। एमालेको सरकार बनेमात्र यो देश बन्छ,’ उनले भने।
पोखरेलले यस अभियानमा नेकपमा माओवादी र एकीकृत समाजवादीका नेता कार्यकर्ताहरुलाई समेत एमालेमा गोलबद्ध हुन आह्वान गरे। ‘आउनुस् वामपन्थी आन्दोलनका सबै मित्रशक्तिहरु नेकपा एमालेलाई बलियो राष्ट्रिय शक्तिको रुपमा स्थापित गरौँ। अब नेपाललाई कुन बाटो हिँडाउने भन्ने प्रश्नको जवाफ जनताको बीचबाट खोजौं,’ उनले थपे।
दलहरुको गठबन्धनले देश बनेको इतिहास कतै नभएको चर्चा गदै उनले आन्तरिक नेतृत्व र राजनीतिक स्थायित्वले मात्रै देश बन्ने बताए। उनले थपे, ‘गठबन्धन अस्थिरताको परिणाम हो। गठबन्धनको नाटकबाट मुलुकले स्थायित्व प्राप्त गर्न सक्दैन। बलियो राष्ट्रिय शक्तिले मात्र मुलुकमा राजनीतिक स्थायित्व दिनसक्छ।’
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’प्रति कटाक्ष गर्दै महासचिव पोखरेलले नेकपा माओवादी केन्द्र सरकारमा भए पनि उसले दलाल पुँजीवादको सेवा गरिरहेको आरोप लगाए।
प्रचण्ड र माधवकुमार नेपालका कारण नेकपा एमालेलाई षड्यन्त्रपूर्ण तरिकाले विभाजन गरिएको समेत उनको आरोप छ। महासचिव पोख्रेलले प्रचण्ड सत्ताबिना बस्न नसक्ने पनि टिप्पणी गरे। महासचिव पोख्रेलले जनताका लागि बोलेका कुराहरु पूरा गर्न सक्नुपर्नेमा जोड दिए।
कार्यक्रममा नेकपा माओवादी केन्द्रका केन्द्रीय सदस्यसहित चार सय बढी नेकपा एमालेमा प्रवेश गरेका छन्।
माओवादी केन्द्रका केन्द्रीय सदस्य मिथिला फुयाँल, नेकपा माओवादी केन्द्रका जिल्ला संयोजक रामकुमार पौडेल, मरिण गाउँकमिटिका निवर्तमान अध्यक्ष गोपाल बुढाथोकीलगायत ४४८ जना एमाले प्रवेश गरेका हुन्। पौडेले राष्ट्रिय भूमि आयोग सिन्धुलीका अध्यक्षसमेत हुन्।
