बनेपा । काभ्रेपलाञ्चोकको धुलिखेलस्थित काठमाडौँ विश्वविद्यालयको २७औँ दीक्षान्त मङ्सिर २९ गते गरिने भएको छ । विश्वविद्यालयका रजिष्ट्रार सुबोध शर्माका अनुसार प्रधानमन्त्री एवम् विश्वविद्यालयका कुलपति शेरबहादुर देउवाको अध्यक्षमा हुने कार्यक्रममा भारतीय विश्वविद्यालय सङ्घका महासचिव डा पङ्कज मित्तलको प्रमुख आतिथ्यता रहने छ ।
यसवर्ष दीक्षित हुने विश्वविद्यालयका स्नातक र स्नताकोत्तर तहका गरी एक हजार ४४९ विद्यार्थीमध्ये मानविकी सङ्कायका २३४, शिक्षाशास्त्र सङ्कायका १०४, इञ्जिनियरिङका २९, कानुन सङ्कायका ४०, व्यवस्थापन सङ्कायका ४१९, मेडिकल साइन्सका ५८१ र साइन्सका ४२ रहेको रजिष्ट्रार शर्माले बताए । त्यस्तै १२ जनालाई पिएचडी र ३० जनालाई एमफिलबाट दीक्षित हुने भएको छ ।
दीक्षित हुनेमध्ये यसवर्ष महिलाको सङ्ख्या बढी रहेको छ । महिला ७४७ अर्थात् ५१ दशमलव ५५ प्रतिशत र पुरुषको सङ्ख्या ७०२ अर्थात् ४८ दशमलव ४५ प्रतिशत रहेको रजिष्ट्रार शर्माले बताए । दीक्षित हुनेमा विदेशी विद्यार्थी बङ्गलादेश, बेनिन, नेदरल्याण्ड, भारत, श्रीलङ्का, माल्दिभ्स, संयुक्त राज्य अमेरिका र रुसका गरी आठ देशका १२३ जना रहेको विश्वविद्यालयल जनाएको छ ।
सो सङ्ख्यासहित काठमाडौँ विश्वविद्यालयबाट २७औँ दीक्षान्त समारोहसम्म आइपुग्दा ३६ हजार ६२४ विद्यार्थी दीक्षित भइसकेको विश्वविद्यालयका उपकुलपति प्रा डा भोला थापाले बताए । यसैबीच विश्वविद्यालयले यही मङ्सिर २५ गते विश्वविद्यालयको केन्द्रिय परिसरमा विविध कार्यक्रम गरी ३०औँ स्थापना दिवस बनाउने भएको छ । सो अवसरमा विश्वविद्यालयले स्थापना कालदेखि नै सेवा गरेका स्व रामानन्द मिश्र र स्व टिकादत्त बराललाई मरनोपरान्त उनीहरूका परिवारलाई केयू–ओरेसन, २०२१ सम्मानपत्र प्रदान गर्ने भएको छ ।
